Gila
Pantas Ginting, eme sekalak anak perana si mesunah kel naik tensina. Mesunah merawa janah nggit kel rubati. Perban merambitna Pantas enda, emaka asa gundari langa bo ia erjabu, emaka kujapape sisada nge ia lalap.

 BACA JUGA : HUMOR KARO PA BUAL

Erkiteken sendah wari minggu, kutiga me Pantas, sura surana gawah gawah dingen cuci mata. Sebab, Pantas enda emkap sekalak anak perana si enggo berumur, tapi asa gundari langa jumpa jodoh.

Enggo puas keliling keliling I pajak Berastagi tambah ka beltek pe enggo besur kerna man Mie Goreng, rempet me mesui beltek Pantas. Emaka ersura ia ndarami kamar mandi umum. Kenca kujah kuje ndarami WC umum, jumpa me Pantas sada WC umum, emaka perban enggo sedak kel iakapna, mis ia ku bas….

 Langa 5 menit ia suk suk bas WC umum, ngerana me sekalak jelma pas samping kamar mandi sebelah Pantas suk suk(buang air besar). Bagenda me percakapenna :

Jelma kamar mandi sebelah : Uga Beritandu?

Pantas : Sehat…. (ise ka kin e maka cakapina aku, bagem nina pantas bas ukurna)

Jelma kamar mandi sebelah : bas ingan simarenda denga kam erdahin?

Pantas : aku kujuma kurumah nge marenda nari, adi kukantor ningen melabo mungkin, adi sekolah pe labo… (ise ka kin e, sok kenal ka kap anak e) bage me isi ukur Pantas……

Jelma kamar mandi sebelah : anakndu 2 denga?

Pantas : anak kai kin maksudn ndu e? erjabu pe aku langa…. Nokoh kam kuakap pe…..(ise kin e, nokoh kel anak e deh, parap ken min sekali anak e deh) enggo emosi Pantas, perban nokoh akapna, tapi penasaren denga ia lalap, ise jelma si samping na e…..

Jelma kamar mandi sebelah : ja kin gundari kam tading?

Pantas : Nungkun engko lalap, ise kin engko???? Ntah akapmu nge bam wartawan?  Adi main atem kita sekali ngata ko, jumpa ja pe engko kutimai (enggo naik tensi pantas, sombong kel anak e pe nina bas pusuhna )

Sinik me kentisik jelma bas kamar mandi sebelah,….. Emaka sora kai pe lanai terbegi……….

Kenca piga piga detik jelma sibas WC sebelah ngerana ka mulihi,……..

Jelma kamar mandi sebelah : kari ka kita ngerana ya dek, lit kalak mehado ngaloi lalap bas kamar mandi sebelah…. Merawa rawa ka ia…. Kari kam kutelpon ya…. Menggo dek….


Iahhhhhhhh, lanai tanggung mela iakap Pantas, , emaka kenca lawas jelma kamar mandi sebelah, emaka lawes ka Pantas, perban melana iakapna… heheheheheh